Супраць журналіста Паўла Мажэйкі завялі новую крымінальную справу

Стала вядома пра новую крымінальную справу супраць былога палітвязня, журналіста Паўла Мажэйкі. Улады распачалі справу яшчэ 11 траўня 2026 года, праўдападобна, па адным з палітычных артыкулаў – 361–4 (садзейнічанне экстэмізму), піша Гарадзенская праваабарона.

Павел Мажэйка. Крыніца фота: Вясна

“Я не ведаю чаго дакладна тычыцца заведзеная справа. Ведаю пра дзесяткі, так званых, працэсуальных дзеянняў у дачыненні да маіх родных, сваякоў і знаёмых: ператрусы, допыты, у тым ліку нефармальныя размовы” – кажа Павел.

Па словах Паўла Мажэйкі, групы сілавікоў у часе ператрусаў шукаюць у Беларусі менавіта яго і «здзіўляюцца», што ніяк ня могуць знайсці.

Адначасна з допытамі ў межах заведзенай крымінальнай справы, па якой журналісту пагражае да 7 год зняволення, на нефармальных “абавязковых” размовах супрацоўнікі КГБ абавязваюць родных Мажэйкі перадаць яму, што ён можа беспраблемна і бяспечна вярнуцца ў Беларусь.

Паводле Мажэйкі, ён ведае, што падобныя “запрашэнні” даходзяць таксама іншым палітвязням, прымусова вывезеным з Беларусі у другой палове 2025 – пачатку 2026 года.

– Я так разумею, што нас прадалі адзін раз, цяпер прыдумалі спосаб, як “зарабіць” на нас двойчы. Гэтыя структуры зрабілі ўжо столькі зла людзям, і ў мяне няма падставаў лічыць, што яны працуюць дзеля Беларусі і беларускага народа. Выпускайце палітвязняў, прыбірайце палітычныя артыкулы: толькі тады людзі дазволяць сабе пачаць задумвацца пра вяртанне на Радзіму, – каментуе сітуацыю Мажэйка.

Гродзенскі грамадскі дзеяч і журналіст Павел Мажэйка быў арыштаваны 30 жніўня 2022 года і асуджаны паводле палітычнага артыкулу на 6 гадоў зняволення ў калоніі ўзмоцненага рэжыму.

11 верасня 2025 года ў ліку іншых беларускіх палітвязняў Павел Мажэйка быў вызвалены з карнай калоніі і прымусова вывезены з Беларусі на тэрыторыю Еўразвязу.