Кропкі сувязі: на Медыякэмпе зладзілі акцыю салідарнасці з палітзняволенымі калегамі

Каля 30 беларускіх журналістаў і журналістак сустрэліся пад Вільняй на Медыякэмпе «Кропкі сувязі», каб не толькі абмеркаваць надзённыя праблемы і набыць новыя веды, але і згадаць пра тых калег, якія сёння ўсё яшчэ знаходзяцца за кратамі ў Беларусі за сваю прафесійную дзейнасць.

МедыяКэмп-2026. Фота: БАЖ

Тры дзясяткі медыйшчыкаў сабраліся на Медыякэмпе пад Вільняй, каб на дзень выйсці з працоўнай руціны, абмеркаваць актуальныя праблемы незалежнай журналістыкі і паразмаўляць пра тое, як медыя могуць працаваць і развівацца ва ўмовах эміграцыі.

Адной з важных частак сустрэчы стала акцыя ў падтрымку беларускіх журналістаў і медыйных работнікаў, якія на сёння знаходзяцца за кратамі ў Беларусі. Удзельнікі кэмпу згадалі палітвязняў-калег і стварылі для іх калажы і паштоўкі.

Творчую частку праводзілі пад куратарствам вядомай беларускай фатографкі. Удзельнікі працавалі з фотаздымкамі, выявамі і іншымі матэрыяламі, спрабуючы ператварыць паштоўкі ў асабістыя пасланні для падтрымкі тых, хто сёння пазбаўлены волі.

Паштоўкі пакуль нельга проста адправіць  адрасатам. Таму арганізатары разглядаюць магчымасць зрабіць з іх выставу — каб паказаць публічна, што за кратамі застаюцца не абстрактныя прозвішчы са спісаў, а канкрэтныя людзі, калегі і сябры, пра якіх памятаюць.

БАЖ заклікае калег ва ўсім свеце падтрымаць акцыю салідарнасці! Вы можаце раздрукаваць партрэты зняволеных калег, сфатаграфавацца з імі ў пазнавальных месцах вашага горада (не ў Беларусі) і апублікаваць у сацыяльных сетках з тэгамі #СвабодуЖурналістам і #BecauseThe­Jour­nal­ist, а таксама даслаць нам на адрас office@baj.media ці inter­comm@baj.media.