Пайшоў з жыцця Мікіта Мелказёраў

Памёр журналіст, вядучы праектаў «Жыццё-маліна» і «Загляне сонца» Мікіта Мелказёраў.

Пра гэта ў Insta­gram паведамілі жонка Мікіты Ліна Цапава і журналіст Аляксандр Івулін. Паводле іх, Мікіты не стала сёння ноччу. Яму было 37 гадоў.

Паводле крыніц Reform.news і Радыё Свабода, журналісту ўвечары 20 снежня стала дрэнна, яму выклікалі хуткую, але не змаглі ўратаваць.

Аляксандр Івулін у сваім посце просіць зараз не турбаваць блізкіх.

«Вельмі прашу ўсіх, асабліва калег-журналістаў, не дадумваць і не турбаваць родных Мікіты. Як толькі будзе нейкая публічная інфармацыя, я паведамлю».

Жонка Мікіты напісала, што пакуль не можа паведаміць падрабязнасці.

Мікіта Мелказёраў — беларускі журналіст, блогер і аўтар папулярнага YouTube‑праекта «Жыццё‑маліна», дзе ён браў доўгія інтэрв’ю ў розных беларусаў, у тым ліку актывістаў і публічных асоб. Таксама ён быў вядоўцам праекту «Загляне Сонца» дзе разглядаў розныя тэмы з гісторыі Беларусі, сувядоўцам перадачы «Мова Нанова» на «Белсаце», калумністам DW. Раней ён працаваў журналістам на «Анлайнеры» і «Трыбуне». Мікіта — сябра БАЖ, капітан футбольнай зборнай каманды журналістаў. 

Адкрыты збор для родных Мікіты Мелказёрава. Падтрымаць можна ПА СПАСЫЛЦЫ

БАЖ шчыра спачувае родным і блізкім калегі.